Denni er kominn heim

Jæja er lentur á Ísafirði. Var í borginni síðustu 2 daga. Og síðasta helgi var undirlögð í Akureyrarferð. Sú ferð var bara snilld. Námskeið, sól, bjór, góður matur, Stroh í kakó, gítarspil og sól.
Bíð eftir boði austur næst eða eitthvað!

Henti bökuðum baunum í ljósmyndara!

Hugh Grant er greinilega blankur fyrst hann hendir bökuðum baunum í ljósmyndara. Enda síðustu dagar mánaðar.
Hvernig er bakki með bökuðum baunum?? Þetta er örugglega þýðingarvilla blaðamanns.

Hugh Grant óskaði börnum ljósmyndara dauða úr krabbameini

Þetta helsta..

Vorum alla síðustu viku í borginni. Notuðum þá ferð í læknisheimsókn og fermingarveislu. Ásamt því reyndum við að hitta sem flesta. En ekki náðist nú að hitta alla á listanum. En ég notaði tækifærið og heimsótti Hjalla bróður og fjölskyldu, þar sem maður hittir þau svo sjaldan. Það er svo langt til Hafnarfjarðar.
Við komum keyrandi á föstudagskvöld og skellti ég mér í spilerí á Langa Manga kvöldið eftir. Átti ég þetta fína kvöld á Langa Manga. Nokkuð sáttur. Enda nánast laus við kvefið og með rödd og fínt sánd.
Svakalega erfitt að vinna upp þetta bloggleysi.

Næst á döfinni er að fara til Akureyrar á föstudaginn. Þar verður tímanum eytt í vinnu. Dauðlangaði að ná mér í spilerí í sömu ferð. En þar sem búið var að bóka þessa helgi og samningar náðust ekki, þá vona ég að mér verði bara boðið í gott partí í staðinn. Eitthvað skilst mér að það sé búið að plana eitthvað ef ég þekki Norðlendinga rétt. Það er líka gott að nota tímann til að hvíla sig á milli atriða.
Svo er stefnan tekin í borgina á miðvikudaginn eftir viku. Þá er það fundarferð.

Aftur í normið

Ég pakkaði mér saman í gær og lá í hýði. Er ekki frá því að ég sé betri. Vantar bara alltaf upp á svefninn í lok nætur. Vakna upp og er á milli svefns og vöku.
Páskarnir voru fínir. Mikið borðað en hefði viljað slaka meira á. Kom að sunnan kortér í páskafrí, liggur við. Þurfti að mæta í vinnu á Skírdag og taka á móti 3 brettum af markaðsdóti. Svo var vinna á laugardeginum, með rokki og róli.
Svo spilaði ég náttúrulega eftir miðnætti á föstudaginn langa. Átti bara mjög fínt kvöld í Kjallaranum í Bolungarvík. Fór svolítið neikvæður af stað. Því ég hef átt slæm kvöld þar. Átti mitt skemmtilegasta kvöld í víkinni fyrr og síðar. Hlakka til að koma þangað aftur.

Slappi

Fór heim í dag úr vinnunni. Ósofinn og slappur. Á erfitt með að lýsa því hvernig mér líður. Í fyrsta lagi er ég búinn að vera kvefaður í 3 vikur! Illa sofinn. Er búinn að fá blóðnasir 2 síðustu nætur, og ekkert smá blæðing og dökk. Held bara að batteríin séu búin hjá mér. Búið að vera mikið flakk á mér síðustu vikur. En ég tók auðvitað vinnutölvuna með heim og er að vasast í hinu og þessu.

Því ÉG á afmæli í dag!

Ég er búinn að fá allnokkrar kveðjur í dag. Þennan dag nítjánhundruðsjötíuogfimm, fæddist ég. Fyrstu kveðjurnar voru þegar ég var að rumska, þá byrjaði Sæunn að syngja fyrir mig. Næst voru það vinnufélagarnir hérna fyrir vestan og svo þegar ég kveikti á tölvunni, biðu mín tölvupóstar. Einnig sá ég að Gummi frændi hafði skrifað í gestabókina.

Páskar

Það fer að styttast í páska. Fyrst þarf ég að skreppa suður á enn eitt námskeiðið. Svo mega páskar koma, með sinni sól, rokk og bjór. Og auðvitað góðum mat og páskaeggjum.
Ég verð eins og ég sagði að spila í Kjallaranum eftir miðnætti Föstudagsins langa. Á laugardeginum verðum við með opið hjá Símanum, og hljómsveitin Reykjavík! ætlar að taka lagið. Gaman að geta brotið aðeins upp daginn og haft rokk og ról í vinnunni. 
Svo er afmæli hjá tengdapabba, og þar munum við stíga á stokk, börn og tengdabörn.

Fer svo suður á fund 12. apríl. Svo lítur út fyrir að ég verði strax viku seinna fyrir sunnan í fermingu.
Flakk á strák!

Kattaskinka? Nei Skattaskýrsla!

Eftir lítinn svefn þarsíðustu nætur, ákváðum við fjölskyldan að fara snemma í bólið í gærkvöldi. Þegar ég er að tannbursta mig mundi ég allt í einu eftir einu. Stekk fram með tannburstann upp í mér og segi á mjög bjagaðri íslensku: "eimumeptiaklara kattaskiptuna!!" (eigum eftir að klára skattaskýrsluna). Sæunn: "Ha? kattaskinkuna???" Ég skolaði og leiðrétti málin. Kveikti aftur á tölvunni, náði í veflykilinn, og kláraði þetta. Fatta sjaldnast hvort ég sé að fá til baka eða borga. En ég þarf aldrei að borga neitt. Bara minni barnabætur sýnist mér. Af hverju heitir þetta "barnabætur"?? Hvað er verið að bæta mér? Hélt maður fengi bætur ef maður yrði fyrir einhverju tjóni.

Auga fyrir auga?

Þarna hefði átt að nota þá aðferð, auga fyrir auga. Eða augu fyrir augu. Sjúkt!!

Dæmdur í 30 ára fangelsi fyrir að rífa augun úr eiginkonu sinni

Fastur í borginni

Átti magnaða helgi á Akureyri á helginni. Kom fljúgandi á föstudaginn um miðjan daginn. Kom við hjá Símaliðinu fyrir norðan. Sótti lykil að íbúðinni hans Jóns Smára, og tók rúnt um bæinn. Kíkti í gamla skólann minn, Verkmenntaskólann á Akureyri.
Svo um kvöldið fór ég með Símastrákunum, Snorra, Haddi og Gísla á tónleika á Græna Hattinum, með hljómsveitinni Hjálmum. Þvílíkt góðir. Eftir smá svefn var mætt á námskeið, það setið allan laugardaginn. Eftir gott námskeið skellti ég mér upp í íbúð og lagði mig. Svo var ég sóttur í partí, þar sem við spiluðum spurningaleikinn Buzz í PS2. Þvílík snilld sá leikur. Eftir fínt partí var skundað í bæinn. Kaffi Akureyri varð fyrir valinu hjá liðinu, þar sem ég stakk af eftir nokkrar mínútur. Stemningin var ekki fyrir mig. Dimmt og leiðinlegt tónlist. Fólk í kös að dansa. Rölti yfir á reyklausa staðinn Café Amour, þar sem var fínn trúbador að spila. Hitti þar Aldísi og Beina. Í nótt þegar ég kom svo á næturstaðinn, þá var ég læstur úti. Hafði fengið lykla að íbúðinni hans Jóns Smára, en hann var í borginni sjálfur, og ekki til útidyralyklar. Ég úllendúllendoffaði dyrabjöllu á efstu hæðinni þar sem ég sá að var kveikt. Sofnaði værum svefni og fór í flug kl 13:15, lenti kl 14 í borginni og sat þar til rúmlega fimm!!! Átti að fara í loftið til Ísafjarðar kl 16:15. Ekki hægt að fljúga vegna veðurs. Samt blíða á báðum stöðum.
Sit núna heima  hjá Kristínu systur og bíð eftir að fá gott að borða. Eina sem ég át gott um helgina var heimatilbúin súpa sem mamma hennar Halldóru Símastelpu á Akureyri mallaði ofan í okkur Símaliðið á laugardaginn í hádeginu. Hitt var mest samlokur, pylsur og allt í lagi Subway loka. Jú og brennd pizza á Plaza.
Mér fannst fín tilbreyting að komast norður í stað suður. Frábær hópur af krökkum sem vinna hjá Símanum á Akureyri. Frekar dugleg að skemmta sér. Hafa alla vega meira þol í það heldur en ég, kallinn.